Tag Archives: Hindi poem

Poem – Sharabi ko badnaam karne walon…

3 Replies

Sharabi ko badnaam karne walon
Batao kaun yahan hosh mein hain

Satta ke bhookhe darinde satya ka galaa ghotne mein hain
Batao kaun yahan hosh mein hain

Unki puja mein magna janta apno se nata todne mein hain
Batao kaun yahan hosh mein hain

Patrakarita ka yogdaan ab asatya ke hawan-kund mein hai
Batao kaun yahan hosh mein hain

Dharam ke naam par aatank failakar kehte hain dharam khatre mein hain
Batao kaun yahan hosh mein hain

Sainiko ki veerta par apni mohar lagane ki aadat aaj badi zor mein hain
Batao kaun yahan hosh mein hain

Jhoot ke vigyapan nirantar doharakar ab satya keval shabdakosh mein hain
Batao kaun yahan hosh mein hain

Sharabi ko badnaam karne walon
Batao kaun yahan hosh mein hain

– Keyur Seta

Main Zinda Hoon (Hindi Poem)

Leave a reply

By: Keyur Seta

Kuchh log kehte hain main kahin kho gayi hoon.
Kuchh ke anusaar meri kabki MAUT ho chuki hai.
Koi kehta hai main humesha se kewal ek BHRAM se zyada aur kuchh nahin rahi hoon.

Jabki sach yeh hai ki mera ASTITVA tha, hai aur rahega.
Kabhi main BOODHE vyakti ko sadak paar karvati hoon.
Kabhi kisi madhyam vargiya insaan ko DAAN dene ke liye prerna deti hoon.
Kabhi kisi ko durghatna mein ghayal hue ANJAAN aadmi ko aspataal pohochane ke liye tatpar karti hoon.

Agar NAKARATMAKTA ka chashma utaar kar dekho toh main har jagah maujood hoon.

Kal subah ugne wala SOORAJ bhi is baat ki gawahi dega ki…

…main ZINDA hoon.

– INSAANIYAT

 

Picture: Energyenhancement.org

Picture: Energyenhancement.org

Naye Saal Ka Naya Veham (New Year Poem)

10 Replies

By: Keyur Seta

Kab tak phool barsenge naye saal par,
Yeh bhi ho jayega ek din purana,
Sookh jayenge tab yeh saare phool,
Samaapti ka iski karega intezar zamana

Door ho jayegi sabhi duvidhayen,
Naye saal mein hoga naya savera,
Nav-varsh lagta atyant bharosemand,
Jhooti ummeeden ban jaati sahara

Purana hoga jab yeh naya saal,
Ho jayegi ummeed ki kiran ojal,
Dhoka de gaya yeh saal bhi,
Aao kare iska bhi qatal,

Naye saal mein kya hai nayapan,
Hai to keval tarikh mein badal,
Tu vijai ho saal ke pratyek din,
Paida kar utna aatmabal

 

(To follow this blog on Facebook, click HERE.)