Ek zamana tha jab mera kad (height) ooncha tha. Lambe kadam chalne mein ek adbhut anand milta tha. Lekin safar ke darmyan dheere dheere mujhe sandeh hua ki kahin mera kad chhota toh nahin ho raha. Agle kuchh varshon mein mera shaq yakeen mein badalta gaya. Aur dekhte hi dekhte is saal mera kad aur bhi chhota ho gaya.
Kabhi mere kad ko kisi Facebook post ke liye chhota kiya gaya toh kabhi kisi haanirahit (harmless) film ke liye.
Pehle toh jab koi naami vyakti mera istamaal karte the tab mera kad chhota hota tha. Aaj toh aam aadmi bhi agar mera istamaal karen toh agle din mera kad aur chhota ho jata hai. Phir dheere dheere main samaj gaya ki sahi baat kehne par mera kad chhota hote rahega.
Ashcharya ki baat yeh hai ki naak aur gala kaatne waale log bhi mera istamaal karne lage hain, jab ki mera unse koi nata nahin.
Mera kad chhota ho jane ke baavjood main naye varsh ki taraf badh raha hoon. Aaj ki sthiti dekhte hue lagta hai ki 2018 mein mera kad aur bhi chhota ho jayega. Meri lambaai kaatne ke liye naye saal mein bhi log tatpar honge.
Ab main zameen ke star par gir jaaun uske pehle mujhe bacha lijiye. Warna meri anupasthiti mein aapka moolya kisi vastu se zyada na hoga.
Aapki,
Abhivyakti Swatantrata
Dear Abhivyakti,
Tumhari vyatha main thodi bohot samajh sakta hun. Bohot toh nahi. Thodi hi. / Tum apna mann chhota na karo. Tum Tiwari, Sharma, Mewani, ya Seta bhi hoti toh tumhare banane ki story shaandaar hoti. Tum toh phir Swatantrata ho. Tumhare banane ki daastaan alag hi level hi hai yaar. Jab jab kadd chota karne walon se ghir jao, unn sir phire doston ko dhoodh liya karo jo zamane se Swatantrata khaandaan ko kandho pe uthaye hain. Arre bhai tiger zinda hai toh abhi aise dost bhi mare nahi hain. Khoob hain.
Chalo, Happy new year tumko.
2018 mein khoob phulo phalo.
Tumhara yaar,
Sumeet.